Државниот завод за статистика (ДЗС) се подготвува за претстојниот попис на населението и смета дека нема да има никакви проблеми во организацијата на оваа статистичка операција.
„Генерално, впечатоците се позитивни, како во однос на соработката со комисиите на пописните реони, така и од организациски аспект“, велат од ДЗС.
Едновремено, ДЗС информира дека активно работи во неколку насоки:
„…Извесни корекции во апликацијата за попишување кои се увидоа во текот на обуката на учесниците во пописот; допечатување на придружните материјали што беа испратени на терен и беа оштетени или не беа вратени; корекции во упатствата и контролниците со новиот датум и период на спроведување на пописот и др.“.
Собранието доцна вечерта на 2 април ги донесе измените на Законот за попис, со што статистичката операција што првично беше планирана да почне на први април, се одложи за пет месеци, односо за периодот од 5 до 30 септември.
Прилогот е подготвен со поддршка на Фондацијата Отворено општество Македонија (ФООМ). Содржината е одговорност на НВО Инфоцентарот и таа не ги одразува секогаш ставовите на ФООМ.
