Во канцеларијата на Народниот правобранител од денеска почна да функционира бесплатната телефонска линија 0800 54321, на којашто граѓаните ќе можат да пријават каква било повреда на нивните права за време на Пописот на населението, домаќинствата и становите, како и за локалните избори што ќе се одржат во октомври.
„По пријавите на граѓаните ќе се постапува веднаш, односно нема да биде следена вообичаената постапка за поднесување претставка, туку претставки ќе се составуваат телефонски. Важно е да се истакне дека Народниот правобранител правата на граѓаните ќе ги штити со барање брзо и ефикасно постапување од надлежните органи во процесот на пописот и изборите, и од другите институции кои се должни да им обезбедат заштита на загарантираните права на граѓаните“, се наведува во соопштението.
Народниот правобранител ги охрабрува граѓаните доколку сметаат дека им е повредено некое од правата да се јават на бесплатниот телефонски број. Телефонската линија ќе функционира во текот на пописот и на двата круга од локалните избори.
Прилогот е подготвен со поддршка на Фондацијата Отворено општество Македонија (ФООМ). Содржината е одговорност на НВО Инфоцентарот и таа не ги одразува секогаш ставовите на ФООМ.
