Државниот завод за статистика преку соопштение извести дека претпладнево, во кратки периоди, се појавиле проблеми при попишувањето на терен .
Во соопштението на ДЗС пишува дека проблемот не се должи на интернет-конекцијата, туку дека е резултат на поголемиот број сесии за попишување кои се случувале истовремено.
„Техничките тимови интензивно работеа на отстранување на проблемот и за кратко процесот продолжи непречено. Би сакале да потенцираме дека проблемот што се појави не се должи на интернет конекцијата со која се овозможува попишување, туку ова се можни и нормални проблеми кои се резултат на поголем број паралелни сесии“.
Во тие 2 до 3 часа додека траеле техничките проблеми, биле попишани речиси 10 илјади лица на целата територија на државата.
Во првиот ден од Пописот, 5 септември, до 20 часот, попишани се 94.975 лица, 28.594 домаќинства и 37.544 станови. Почна да расте и бројот на самопопишани нашинци од дијаспората. Заклучно со 5 септември тој број е над 191 илјади.
Прилогот е подготвен со поддршка на Фондацијата Отворено општество Македонија (ФООМ). Содржината е одговорност на НВО Инфоцентарот и таа не ги одразува секогаш ставовите на ФООМ.
